Хитойда хизмат итлари билан кўз ёшли видолашув маросими
Хитойда инсонлар ҳаётини қутқариш ва хавфли вазиятларда жасорат кўрсатган полиция итлари шарафига таъсирли маросим ўтказилди. Тўртта хизмат ити узоқ йиллик хизматдан сўнг расман нафақага чиқарилди ва янги оилаларга топширилди. Бу ҳақида South China Morning Post хабар берди.
Маросимда 2017 йилда фирибгарларни ушлашга ёрдам берган 10 ёшли белгиялик овчарка Метт, сапёр сифатида хизмат қилган 10 ёшли кокер-спаниел Керри, тайфун пайтида уч инсонни қутқарган 10 ёшли малинуа – Мажингтиан ва портловчи моддаларни излашда тажриба тўплаган 8 ёшли лабрадор ретривер Ели ўз устозлари билан хайрлашди.
Айни пайтда маросимнинг онлайн трансляцияси уч миллиондан зиёд томошабин тўплади. Хайрлашув чоғида энг таъсирли лаҳза Елининг ўз мураббийини кўриб қолиши бўлди. Ит кутилмаганда арқондан чиқиб, устозига қараб югурди. Бу манзара маросим иштирокчиларини кўз ёшга солди.
“Елининг ўз мураббийига югурганини кўрганимда қалбим титраб кетди. Бу тўртта итнинг устозлари билан қандай мустаҳкам боғланганини англадим”, деди маросим иштирокчиларидан бири.
Хитойда хизмат итлари жуда қийин саралаш ва машғулотлардан ўтишади. Танлов жараёни бир ёки икки йил давом этиб, улар ҳарбий-денгиз флоти, ҳарбий-ҳаво кучлари ёки полиция бўлинмаларида хизматга тайёрланади. Сўнгра беш йилдан саккиз йилгача хизмат қилишади.
Нафақага чиққан итлар учун эса янги уй қидирилади. Улар кўнгиллилар ёки ҳуқуқ-тартибот тизимидаги собиқ мураббийлар томонидан қабул қилинади. Шу тариқа қаҳрамон итлар тинч ҳаётга қадам қўяди, аммо уларнинг хизмат даврида кўрсатган жасорати ва садоқати эл орасида ёдда қолади.