Артур Бетербиев Канело – Кроуфорд жангини тарихий деб атади
Собиқ мутлақ жаҳон чемпиони Артур Бетербиев яқинда бўлиб ўтадиган Саул “Канело” Альварес ва Теренc Кроуфорд жанги ҳақида ўз фикрларини билдирди. Унинг таъкидлашича, бу тўқнашув замонавий бокснинг энг муҳим воқеаларидан бири сифатида тарихда қолиши аниқ.
“Баъзи пайтларда боксда кечаётган жараёнларга қараб, ҳақиқатан ҳам ғаройиб даврда яшаётганимизни ҳис қиламиз. Яқин кунларгача кўплаб бундай жанглар амалга ошиши мумкин эмасдек кўринарди. Промоутерлар ўртасидаги келишувлар, телеканаллар, жанг жойи, вақти ва гонорар масалалари ҳамма нарсани чегаралаб қўярди.
Бироқ бугун эса вазият мутлақо ўзгарди. Энг йирик ва машҳур номлар рингда юзма-юз тўқнашмоқда. Бу жараёнда Турки Ал ашь-Шейхнинг хизмати беқиёс. Унинг саъй-ҳаракатлари орқали профессионал бокс яна жаҳон спорт саҳнасида марказий мавзуга айланди. Томошабинлар эса ҳақиқий жангларни, интизорлик уйғотувчи тўқнашувларни ва энг кучлиларнинг беллашувини кўриш имкониятига эга бўлишмоқда.
13 сентябрь куни “Канело” Альварес америкалик Теренc Кроуфордга қарши рингга чиқади. Бу жанг олдинлари фақат хаёлда, орзудагина бўлиши мумкин эди”, — деди Бетербиев.
Эслатиб ўтамиз, ушбу улкан тўқнашув 14 сентябрь куни Ўзбекистон вақти билан соат 09:00 да старт олади.