Миржалол Қосимов: “Бир ўйинда кўп хатога йўл қўйдик”
Суперлиганинг 21-туридан ўрин олган “Сўғдиёна” – ОКМК (4:1) учрашувидан кейин меҳмонлар бош мураббийи Миржалол Қосимов матбуот анжуманида ўйин ҳақида ўз фикрларини билдирди.
– Нима дейиш мумкин, жуда пароканда ўйин кўрсатдик. Аввало, ўз мухлисларимиздан кечирим сўрайман. “Сўғдиёна”ни муносиб ғалаба билан табриклайман. Биринчи, учинчи ва тўртинчи голларда гўё тажрибасиз болалардек хатога йўл қўйдик. Шу билан бирга, рақиб футболчиларининг маҳорат даражаси ҳам ҳал қилувчи омил бўлди. Айниқса, Дориев ўз голлари орқали имкониятдан қандай унумли фойдаланиш мумкинлигини намойиш қилди. Лекин айбни ўзимиздан излашимиз шарт. Бу даражада оддий хатоларни йўл қўймаслигимиз лозим эди. Бу ҳолатларни чуқур таҳлил қиламиз. Ҳозир эса аниқ айта оламанки, ҳимоядаги учта йирик хатонинг оқибатида дарвозамизда голлар кўрдик, – деди Қосимов.
Шунингдек, мураббий иккинчи даврада жамоа ўйинидаги пасайиш ҳақида ҳам тўхталди:
– Сабаб – оддий. Бундай хатоларни қилиш мумкин эмас. Имкониятларни голга айлантириш керак. Йигитларда дарвозамизга тўп киритилгандан кейин “қайтариб гол уриб оламиз” деган ишонч пайдо бўлгандек туюлди. Лекин футбол доим ҳам ўзимиз ўйлагандек кечмайди, рақиб ҳам бор. Масалан, ҳисоб 3:1 бўлган пайтда Али Абдураҳмонов ёки Нодир Абдураззоқов каби футболчиларда яхши имкониятлар юзага келди. Лекин ундан фойдаланолмадик. Асосий сабаб мана шу.
Қосимов жамоа марказда ютқазгани ҳақидаги саволга эса шундай жавоб берди:
– Йўқ, биринчи таймда ҳам яхши ҳужумларимиз бўлди. Иккинчи бўлимда улар камайди, бу тўғри. Лекин биз охиригача курашдик. Футболнинг гўзаллиги шундаки, ҳамма нарса режага мувофиқ кечавермайди. Чунки майдонда рақиб жамоа ҳам бор. “Сўғдиёна” билан учрашувлар доим кескин ва курашларга тўла бўлади. Бугун эса учта жуда оддий вазиятда дарвозамиз ишғол этилди.
Мураббийнинг сўзларига кўра, кўплаб хатоларни бир ўйинда қилиш келажак учун тузатиш имконини беради:
– Балки, бир ўйинда кўп хато қилганимиз ҳам ёмон эмасдир. Чунки айтишади-ку, бешта ўйиннинг барчасида биттадан хато қилиб мағлуб бўлганингдан кўра, барчасини битта ўйинда қилиш яхшироқ. Биз ҳам, рақиб ҳам кўпинча очиқ футбол ўйнаймиз. Шу сабаб баъзан натижа ҳам кутилганидек чиқмайди, – деди Қосимов.
Манба: championat.asia