Чарли Кирк қотили деб гумонланган шахс қўлга олинди

Америкада катта резонанс келтирган Чарли Киркнинг ўлдирилишига алоқадор тергов ишларида муҳим бурилиш юз берди. CNN хабарига кўра, 22 ёшли Юта штати фуқароси Тайлер Робинсон Кирк қотиллигида гумонланиб расман қўлга олинди.

Маълум қилинишича, Робинсон ўз қилмишини отасига тан олган. Ҳодиса тафсилотларига кўра, отаси ўғлини тинчлик билан таслим бўлишга кўндирган ва маҳаллий ёшлар жамоатининг пасторини ёрдамга чақирган. Пастор эса ўз навбатида АҚШ маршаллари билан боғланиб, гумонланувчини ҳуқуқ-тартибот идораларига топширишда иштирок этган.

CNN тарқатган маълумотларга кўра, Тайлер Робинсоннинг қўлга олиниши ҳақидаги хабар АҚШ президенти Доналд Трампнинг интервьюсида ҳам тилга олинди. У Fox News телеканалига берган суҳбатида “жиноятчи қўлга олинди ва уни полицияга яқин кишиси топширди”, дея таъкидлади. Шунингдек, Трамп марҳум Чарли Киркнинг оиласига чуқур ҳамдардлик билдирди.

Эслатиб ўтамиз, 10 сентябрь куни Чарли Киркга суиқасд уюштирилган ва у жароҳатлар оқибатида шифохонада вафот этган эди. Ҳодиса ортидан Федерал қидирув бюроси қотилни қидириш учун жамоатчиликка мурожаат қилиб, ишончли маълумот учун 100 минг доллар мукофот эълон қилганди.