Ўзбекистонда жарима балллари қоидабузарликларни 41% га камайтирди
Ўзбекистонда жарима балллари тизими жорий этилганидан сўнг ҳайдовчилар томонидан Йўл ҳаракати қоидаларини бузиш ҳолатлари 41% га камайди, деб хабар берди ИИВ Йўл ҳаракати хавфсизлиги хизмати.
Балл тизими 2024 йил 1 июндан амалга киритилган. Илк уч ойда 69 мингга яқин ҳайдовчи жарима балл олди. Уларнинг 63,9 минг нафарига 0,5 дан 1 гача, 4976 нафар ҳайдовчига икки баллгача, 189 нафарга уч балл берилган.
Шунингдек, 14 нафар ҳайдовчи 4 балл, 4 нафар эса 5 балл олган. Шу билан бирга, 9,3 миллион ҳайдовчи умуман балл олмагани қайд этилди. Бу тизим интизомни оширганини кўрсатади.
2024 йил ёзида қайд этилган қоидабузарликлар сони 285 минг бўлган бўлса, жорий йилнинг худди шу даврида бу кўрсаткич 167 мингни ташкил этди. Йўл-транспорт ҳодисалари сони эса 338 тагача тушиб, учдан бирга камайди.