Коммуналь хезмәтләр өчен вакытында түләмәгәнгә процентлар өстәүне тыярга тәкъдим иттеләр
Дәүләт Думасының Халыкара эшләр буенча комитеты рәисе Леонид Слуцкий торак-коммуналь хуҗалык компанияләренә коммуналь хезмәтләр өчен вакытында түләмәгәнгә гражданнардан процентлар алуны тыярга кирәк, дип белдерде. Бу хакта РИА Новости хәбәр итә.
«Коммуналь хезмәтләр банклар яки башка финанс оешмалары функцияләрен үтәми. Шуңа күрә торак-коммуналь хуҗалык компанияләре вакыты чыккан яки тулы булмаган түләүләр өчен безнең гражданнардан процентлар алырга хокуклы түгел», - диде Слуцкий.
Ул билгеләп үткәнчә, әгәр коммуналь хезмәтләр гамәлләре аркасында кешеләргә ут яки суны сүндерәләр икән, бу оешмаларның хезмәткәрләре зыян өчен пеня түләми, ә түләү вакыты узган очракта пенялар шунда ук исәпләнә.
Моннан тыш, аның сүзләренчә, торак-коммуналь хуҗалык хезмәткәрләренең түләмәүчеләргә йогынты ясау өчен мөмкинлеге җитәрлек, шул исәптән су яки электрны сүндереп кую.
«Мондый ысулны коммунальчылар, сүз уңаеннан, еш һәм оператив куллана. Шул җиткән», – дип йомгаклады Слуцкий.