Илёс Зейтуллаев: “Ғалаба осон бўлмади, аммо сифатли ўйнадик”
Суперлиганинг 21-туридан ўрин олган “Бунёдкор” – “Хоразм” (1:0) учрашувидан кейин пойтахт клуби бош мураббийи Илёс Зейтуллаев журналистлар билан суҳбатда иштирок этди ва ўйин юзасидан фикрларини билдириб ўтди.
Мураббий аввало янги стадионда тўп тепишдан олган таассуротлари ҳақида тўхталди:
– Олимпия мажмуаси катта меҳнат билан барпо этилган ва бу ерда ўйнаш алоҳида ҳиссиётларни уйғотди. Йигитлар катта куч сарфлаб жуда оғир беллашувни ўтказишди. Шунинг учун ғалаба билан жамоамизни чин дилдан табриклайман. Биз “Хоразм”га қарши баҳс осон кечмаслигини яхши билардик. Чунки улар Суперлигада қолиш учун курашаётган жамоа сифатида ҳар бир учрашувда охиригача жанг қилади.
Шунингдек, у футболчиларнинг ҳаракат суръати ҳақидаги саволга ҳам муносабат билдирди:
– Кимгадир жамоа оғир ҳаракат қилгандек туюлгандир, аммо мен мутлақо бундай деб ўйламайман. Аксинча, футболчилар сифатли ўйин намойиш этишди. “Хоразм” тажрибали мураббий қўл остида яхши тайёргарлик кўрган жамоа. Улар очко учун келганини англаб тургандик ва ҳатто ғалаба қозонишлари ҳам эҳтимолдан ҳоли эмасди. Биз эса секинроқ, аммо ўйин сифатига урғу берган ҳолда ҳаракат қилдик.
Зейтуллаев стадион газони ҳақида ҳам ўз фикрини билдирди:
– Майдон ҳолати қониқарли. Асосийси, бутун Суперлигада барча жамоалар яхши майдонларда ўйнаши керак. Шундагина миллий чемпионатда футбол тараққиёти ҳақида жиддий гапириш мумкин бўлади. Бунинг учун вақт ва молиявий сарф зарур, лекин мақсадга эришишга арзийди.
Жамоанинг ҳозирча тўртинчи ўринни эгаллаб тургани ҳақида саволга жавоб берган мураббий барча саъй-ҳаракатларни жамоавий меҳнат самараси эканини таъкидлади:
– Бу натижада ҳамманинг ҳиссаси бор. Йил бошида раҳбарият билан режаларни муҳокама қилганмиз. Қайси йўлдан бориш, кимларга рақобатчи бўлиш масаласида бир неча вариант кўриб чиқилганди. Энг муҳими, ўз ғоя ва услубимизни футболчиларга сингдира олишдир. Шу йўлдан қатъият билан юриб келмоқдамиз.
Шу тариқа, Зейтуллаев жамоанинг олдинги мақсадлари аниқ ва уларга йигитларнинг иштиёқи ҳам етакчи куч бўлаётганини таъкидлаб, мухлисларни янада кўпроқ қувончли паллалар кутмоқда деган умидни билдирди.
Манба: championat.asia