Ўзбекистон ва Кения расмий дипломатик алоқаларни йўлга қўйди

Ўзбекистон Республикаси ва Кения ўртасида янги тарихий босқич – дипломатик муносабатлар ўрнатилди. Ушбу муҳим воқеа 20-сентябрь куни Нью-Йорк шаҳрида рўй берди.

Тадбир чоғида Ўзбекистон ташқи ишлар вазири Бахтиёр Саидов ҳамда Кения бош вазири, ташқи ишлар ва диаспора ишлари вазири Мусалия Мудавадий икки давлат ўртасида дипломатик алоқаларни ўрнатиш ҳақидаги расмий коммюникени имзоладилар.

Имзо маросимидан сўнг Бахтиёр Саидов Кенияни Африканинг энг тез ривожланаётган, барқарор иқтисодий ўсиш кўрсатаётган мамлакатларидан бири сифатида эътироф этди. Шунингдек, унинг айтишича, Кения ҳозирда технология ва инновациялар соҳасида минтақанинг етакчи марказларидан бири сифатида намоён бўлмоқда.

Томонлар суҳбат жараёнида икки халқ манфаатларига тўғридан-тўғри хизмат қиладиган кенг қамровли ҳамкорлик йўналишларини муҳокама қилдилар. Шу орқали савдо, инвестиция, технология ва маданий алоқаларни кучайтириш имкониятлари белгилаб олинди.

Қайд этиш жоизки, Кения Ўзбекистон билан расмий дипломатик муносабат ўрнатган 163-давлат сифатида тарихда қолди. Бу эса Тошкентнинг Африка қитъаси билан янгидан шаклланаётган мулоқот ва шериклик сиёсатининг муҳим қадами бўлди.