Сергей Лушчан: «Баъзи футболчилар жамоага қарши ўйнаяпти»
Суперлиганинг 22-туридан ўрин олган «Бухоро» – «Навбаҳор» учрашувидан кейин мезбонлар 5:0 ҳисобида йирик ғалаба қозонди. Наманган клуби учун эса бу йирик мағлубият ортидан катта танқидлар ва оғир мулоҳазаларни олиб келди. Учрашувдан сўнг «Навбаҳор» бош мураббийи Сергей Лушчан матбуот анжуманида чиқиш қилди ва ўз жамоаси ҳақида кескин фикрлар билдирди.
Мураббийнинг сўзларига кўра, биринчи таймдаги ўйин жуда паст даражада кечган ва жамоа ҳимояга умуман эътибор қаратмаган. «Агар ҳимояда жавобгарлик бўлмаса, натижа шундай бўлади. Ҳаттоки рақиб яна бир неча гол уриши ҳам мумкин эди», — деди у.
Лушчан клуб ичидаги муаммоларга ҳам тўхталиб ўтди. У қарздорлик ва шартномалар масаласи ҳали ҳам ҳал этилмаганини, айрим футболчилар эса жамоа учун эмас, балки жамоага қарши ҳаракат қилаётганини очиқчасига айтиб ўтди. «Тўғрисини айтсам, бугунги ўйиндан кейин ярим жамоа учун мавсум тугади. Чунки улар ўз клуби манфаатини эмас, рақиб манфаатини кўпроқ кўзлашди», — дея таъкидлади мураббий.
ОАВ ва журналистларнинг саволларига жавобан Лушчан «Бухоро»нинг ўйини ҳақида ҳам фикр билдирди. Унинг таъкидлашича, натижани рақибнинг кучидан кўра, «Навбаҳор»нинг ўзига яраша хатолари белгилаб берган. «Қандай қаршилик ҳақида гапиряпсиз? Биз ўзимизга ўзимиз бешта гол уриб бердик. Агар ҳассага таянган кампир майдонга чиқса ҳам бугун олтита гол урарди», — деди у кескин лаҳжада.
Шу билан бирга, мураббий жамоанинг ички муҳитида жиддий ўзгаришлар зарурлигини таъкидлади. Унинг айтишича, иккинчи давра бошланганидан бери айрим ўйинчиларнинг жамоа манфаатига қарши ҳаракатлари кузатилмоқда. Бу эса клуб натижасига салбий таъсир кўрсатмоқда.
«Навбаҳор»нинг айни пайтдаги ҳолати ва Лушчаннинг очиқчасига билдирган танқидлари мухлислар орасида катта баҳс-мунозараларга сабаб бўлди. Энди клуб раҳбарияти ва мураббийлар штаби қандай чора кўради — буни вақт кўрсатади.
Манба: championat.asia