Трамп хорижликлар учун виза тўловини 500 бараварга оширди

АҚШ президенти Доналд Трамп ишчи визаларига оид янги қоида жорий этиш ҳақида фармон имзолади. Reuters агентлигининг маълумот беришича, янги тартибга кўра, хорижий малакали мутахассислар учун энг кўп қўлланиладиган H-1B иш визасини расмийлаштиришда компаниялардан эндиликда 100 минг АҚШ доллари миқдорида йиғим ундирилади. Бу эса ҳозирги амал қилувчи тўловлардан қарийб 500 баравар кўпроқдир.

Мазкур қарор айниқса АҚШ технология соҳаси учун жиддий қийинчиликларни юзага келтириши мумкин. Чунки мамлакатдаги йирик IT компаниялар кўпинча Ҳиндистон ва Хитойдан келадиган малакали мутахассисларга таянади. Янги тартиб эса мазкур кадрлар оқимини кескин қисқартириши эҳтимол қилинаётгани қайд этилмоқда.

Маълумотларга кўра, АҚШ ҳар йили тахминан 85 минг атрофида H-1B визаси ажратади. Бу визалар асосан юқори даражадаги IT мутахассислари, муҳандислар, илмий ходимлар ва тадқиқотчилар учун мўлжалланган. Тўловларнинг шундай миқдорда оширилиши эса катта корпорациялар учун қўшимча юк бўлиб, айниқса стартаплар ва кичик бизнеслар учун хорижлик кадрларни ёллаш имкониятини кескин чеклаши мумкин.

АҚШ ҳукумати бу қарорни миллий меҳнат бозорини ҳимоя қилиш ва америкалик мутахассислар учун иш ўринларини устувор қилиш мақсади билан изоҳламоқда. Бироқ катта технология компаниялари, халқаро бизнес ва экспертлар бу ғояни кескин баҳс-мунозара билан қарши олди.

Мутахассислар таъкидлашича, бу қадам Америка иқтисодиётига икки хил таъсир кўрсатиши мумкин: бир томондан маҳаллий мутахассисларнинг имкониятлари ошиши мумкин бўлса, иккинчи томондан йирик IT корпорацияларига рақобатбардошлик ва инновация соҳасида жиддий тўсиқ бўлиши мумкин.