Israelske ministrar oppmodar til annektering av Vestbreidda

Fleire Israelske høgreekstreme ministrar oppmodar til annektering av Vestbreidda, det melder den israelske avisa Haaretz.

Det skjer etter at Canada, Storbritannia og Australia sundag anerkjenner Palestina som stat.

Den israelske tryggingsministeren Itamar Ben-Gvir skreiv på X at anerkjenninga av Palestina er å gi «ein pris til mordarane av ofra i Neve Shalom».

Han meiner dette krev ei strakstilt annektering og vil legge fram forslag om det på neste regjeringsmøte.

Medan kulturminister Miki Zohar kallar anerkjenninga for «ei meiningslaus fråsegn som stinkar av antisemittisme og hat mot Israel».

I innlegget la kulturministeren også til at den einaste rette responsen er «å innføre israelsk suverenitet i Judea, Samaria og Jordandalen».

Judea og Samaria er område som i dag utgjer Vestbreidda.

Også finansminister Bezalel Smotrich reagerer kraftig på avgjerda.

– Dagane då Storbritannia og andre land skulle bestemme framtida vår er over, mandatet er over, skreiv han på X.

Han skriv vidare at svaret på anerkjenniga må vere å ta full israelsk kontroll over Judea og Samaria og avvise ein palestinsk stat for alltid.

Yair Golan, leiar for opposisjonspartiet Demokratane, tar ikkje til orde for annektering.

Han skreiv at anerkjenninga er eit «alvorleg diplomatisk nederlag» for Benjamin Netanyahu og finansminister Bezalel Smotrich.

Golan meiner at regjeringa har feila i krigshandteringa og bør heller sikre ein avtale som endar krigen, frigir gislane og vernar tryggleiken på lang sikt.