АҚШда яшаш учун энди грин-картани кутиш шарт эмас
19 сентябрь куни Доналд Трамп хорижий фуқаролар учун АҚШда тезкор тартибда яшаш ҳуқуқини тақдим этувчи Trump Gold Card дастурини жорий этиш тўғрисида фармон имзолади, деб uz24.uz хабар берди.
Янги дастур шартларига кўра, 1 миллион доллар тўлашга рози бўлган, юқори малакага ёки салоҳиятга эга хорижликлар Gold Card олиш ҳуқуқига эга бўлади. АҚШ компаниялари эса ўзларининг хорижлик ходимлари учун яшаш ҳуқуқини расмийлаштириш мақсадида 2 миллион доллар тўлаши мумкин.
Шунингдек, 5 миллион доллар тўлаганларга Trump Platinum Card берилади. Бу карта эгалари АҚШдан ташқарида топган даромадлари учун солиқ тўлашдан озод этилади.
Трамп дастурни “самарали ва фойдали инсонларни жалб этувчи” деб баҳолаб, мамлакат иқтисодиётига миллиардлаб доллар киришини таъкидлади. АҚШ савдо вазири Говард Латникнинг сўзларига кўра, дастур орқали янги бизнеслар очилиши ва юзлаб иш ўринлари яратилиши кутилаяпти. Унинг баҳолашича, бюджетга 100 миллиард доллардан ортиқ маблағ тушиши мумкин.