Внуково ходими бизнес-зал учун 655 минг рубль тўлайди
Внуково аэропорти ходими банк орқали бизнес-залдан ноқонуний фойдалангани учун 655 минг рубль тўлашга мажбур бўлди. Бу ҳақда суд ҳужжатларига таяниб, “РИА Новости” хабар берди.
У махсус банк пакетини харид қилиб, борт талони ёки чипта кўрсатиш орқали аэропорт ва вокзаллардаги бизнес-залларга кириш ҳуқуқига эга бўлган. Бироқ беш ой давомида у залларга 364 марта ташриф буюрган: асосан Внуковода, шунингдек Шереметьево, Домодедово ва Сочида ҳам.
Текширув жараёнида ходим ўзининг кириш кодини бошқа одамлар билан баҳам кўргани маълум бўлди. Биринчи инстанцияда суд фақат 12,6 минг рубль тўлашга қарор қилган бўлса, кейинги босқичларда апелляция ва кассация ишлари натижасида ундан тўлиқ маблағ ундирилди.
Суд қарорини асослаб, ташрифлар сони, давомийлиги ва бир вақтнинг ўзида бир неча киши фойдаланган ҳолатлар кўриб чиқилди.