Симеоне "Мадрид дербиси"даги йирик ғалабаси ҳақида нималар деди?

"Мадрид дербиси"да «Атлетико» ўз уйида «Реал»ни йирик 5:2 ҳисобида мағлуб этиб, мухлисларини қувончга буркади. Учрашувдан кейин жамоа бош мураббийи Диего Симеоне журналистлар билан фикр алмашди ва ўйин тафсилотлари ҳақида сўз юритди.

Симеоненинг таъкидлашича, «Реал» дунёнинг энг кучли клубларидан бири ҳисобланади ва беллашув олдидан уларга қандай қийинчилик туғдириш мумкинлигини пухта ўйлаб чиққан. Унинг сўзларига кўра, Нико Гонсалес, Жулиано Симеоне, Пабло Барриос ва Хулиан Алварес қанотларда фаол ҳаракат қилиб, марказий ҳимоячиларни ортга тортиб, Александр Сёрлот учун қулай имкониятлар яратишган. Шу тариқа, «Атлетико» голли вазиятларни самарали амалга оширишга муваффақ бўлди.

«Икки бор дарвозамизга тўп киритилганига қарамай, жамоамнинг ўйинидан жуда мамнунман. Ҳиссиётларимни ифода этиш қийин. Бу мавсум биз учун осон бошланмади, лекин шундай шароитда ҳам бутун клуб жамоаси қаттиқ меҳнат қилди. Улардан миннатдорман, чунки бу меҳнатнинг меваси майдонда кўзга ташланди», – деди мураббий.

Аргентиналик мутахассис «Ливерпул»га қарши кечган баҳсдан кейин жамоа аниқ ривожланиш йўлини топганини таъкидлади. Шу билан бирга, у айниқса Хулиан Алвареснинг ўйинига алоҳида тўхталди. «Алварес нафақат ҳужумда муҳим куч, балки садоқати ва жамоага бўлган садоқати билан ҳам ажралиб туради. Унинг меҳнатсеварлиги ва иқтидори клубимиз учун беқиёс. Бизга у керак, уни асраб қолишимиз шарт ва умид қиламанки, Хулиан яна кўп йиллар давомида «Атлетико» шарафини ҳимоя қилади», – дея қайд этди Симеоне.

«Атлетико»нинг дербидаги ғалабаси нафақат жамоа, балки бутун клуб тизими учун катта руҳий туртки бўлди. Симеоне эса ўз навбатида, бундай ғалабалар меҳнат ва садоқат меваси эканини таъкидлаб ўтди.