«Манчестер Юнайтед» ушбу уч футболчидан воз кечишга қарор қилди
Англиянинг машҳур клуби «Манчестер Юнайтед»да янги мавсум олдидан жиддий ўзгаришлар кутиляпти. The Sun нашри ёзганидек, клуб раҳбарияти жорий мавсум якунлангач, таркибдаги бир қатор футболчилар билан хайрлашишга қарор қилди.
Маълумотларга кўра, «қизил иблислар» трансфер бозорида йирик харид амалга ошириш ниятида. Айниқса, майдон марказига янги ижрочи олиб келиш учун катта маблағ талаб этилади. Шу боис клуб шартномаси 2026 йилнинг 30 июн куни якунланадиган футболчилардан уч нафарига янги битим таклиф этмасликка қарор қилди.
Биринчи навбатда, жамоа сардорларидан бири бўлган бразилиялик тажрибали яримҳимоячи Каземирога ишонч сўндирилди. 33 ёшли футболчи жамоада энг катта маош оладиганлардан бири саналади, шунинг учун клуб ундан воз кечишга қарор қилди.
Шунингдек, ҳозирда «Астон Вилла» сафида ижара асосида тўп суриб келаётган қанот ҳужумчиси Жейдон Санчо ҳам қайтиб келгандан сўнг таркибда қолмаслиги кутиляпти. МЮ раҳбарияти ундан тезроқ қутилиш ниятида экани айтилади.
Яна бир футболчи – чап қанот ҳимоячиси Тирелл Маласиа ҳам ўз жамоасини алмаштириши талаб этилади. Ёзда уни Туркия чемпионатига йўллаш ҳақида музокаралар бўлган, бироқ ўшанда трансфер амалга ошмай қолган эди.
Клуб мутасаддилари янги мавсум олдидан таркибда жой бўшатиш ва маблағ тежаш орқали марказий яримҳимоячи позициясига янги юлдуз олиб келишга бел боғлаган. Бу қарор МЮнинг кейинги йиллардаги жиддий қайта қуриш режаларининг бир қисми сифатида баҳоланмоқда.
Шу тариқа, Каземиро, Санчо ва Маласиа «Олд Траффорд»даги фаолиятини якунлаб, эркин агент сифатида ўзларига янги клуб излашга мажбур бўлишади.