«Қайрат» мураббийи "Реал"дан учралган йирик мағлубият ҳақида нималар деди?
Европа Чемпионлар Лигаси 2-туридан ўрин олган «Қайрат» – «Реал» баҳси Олма-отада катта қизиқиш билан кузатилди. Уюшқоқ ўйин кўрсатишга ҳаракат қилган қозоғистонликлар, афсуски, кучли рақибга қарши тўлиқ қаршилик кўрсата олишмади ва 0:5 ҳисобида мағлубиятга учрашди. Учрашувдан кейин «Қайрат» жамоаси бош мураббийи Рафаэл Уразбахтин матбуот анжуманида ўз фикрларини баҳам кўрди.
«Реал» билан ўйнаш — ўзига хос мактаб
Уразбахтин фикрича, «Реал» каби клубга қарши баҳс жамоа учун катта тажриба сифатида хизмат қилди:
«Бу ҳақида нима дейиш мумкин? Биз турли даражадаги жамоалармиз ва буни тан олишимиз шарт. Бундай рақибга қарши ўйин бизга катта мактаб бўлди. Албатта, мағлубият ҳар доим алам қилади, аммо бизнинг даражамиздан келиб чиқсак, футболчилар яхши ҳаракат қилишди. Айрим лаҳзаларда майдонда устунликка ҳам эга бўлдик».
«Гол уриш имкониятлари бўлди»
Мураббий жамоаси ўйин давомида ҳужумда имкониятларга эга бўлганини таъкидлади:
«Эҳтимол, битта гол уришга арзийдиган вазиятларимиз бўлди, аммо уларни охирига етказа олмадик. Шунга қарамай, футболчиларимдан миннатдорман. Улар майдонда бор кучини ишга солишди. Бизнинг чемпионатда бундай юқори темп йўқ, аммо биз кучимиз етганича ҳаракат қилдик».
Мухлисларга миннатдорчилик
Уразбахтин мухлисларнинг қўллаб-қувватлашини алоҳида эътироф этди:
«Жамоага ёрдам берган барча мухлисларга катта раҳмат. Қуръада «Реал» тушгани биз учун маълум маънода омад ҳам бўлди. Чунки бундай жамоаларни Қозоғистонга қанчалик кўп олиб келсак, бутун мамлакат футболи учун фойда бўлади. Футболчилар ўсади, клуб ҳам тажриба орттиради».
«Стандарт вазиятлардан фойдаланмоқчи эдик»
Мураббийнинг айтишича, жамоа стандарт вазиятларда кўпроқ гол уришга интилишни режалаштирган:
«Ўйинчиларга стартни фаол бошлаш кераклигини айтгандик. Биринчи дақиқалардаёқ гол уриш имкониятимиз бўлди. Бироқ «Реал» каби кучли рақибга қарши юқори темпни сақлаб қолиш қийин. Биз стандарт вазиятлардан фойдаланишни хоҳладик, аммо бу насиб этмади».