Хитойлик аёл 6,7 миллиард долларлик биткоин ўғирлагани фош этилди

Лондондаги суд 47 ёшли Хитой фуқароси Чжимин Цянни 6,7 миллиард долларлик биткоинларни қўлга киритиш ва улар орқали Буюк Британияда қимматбаҳо кўчмас мулк сотиб олиш орқали маблағларни ўғирлашга уринганликда айбдор, деб топди. Бу ҳақда Скотланд-Ярд матбуот хизмати ўз расмий сайтида маълумот тарқатди.

Расмий маълумотларга кўра, тергов жараёнида аёлдан 61 мингдан ортиқ биткоин мусодара қилинди. Бу тарихдаги энг йирик криптовалюта мусодараси сифатида қайд этилмоқда.

Текширувчиларнинг аниқлашича, Цянь 2014–2017 йиллар оралиғида 128 мингдан зиёд Хитой фуқаросини, жумладан тадбиркорлар, нафақахўрлар, банк хизматчилари ва суд тизими ходимларини турли йўллар билан алдаган. У қўлга киритган улкан маблағларни биткоинга айлантирган ва сохта ҳужжатлар ёрдамида Буюк Британияга кўчиб ўтган. Бу ерда эса у қимматбахо уй-жойлар сотиб олиб, маблағларни қонуний кўринишга чиқаришни режалаштирган.

The Sun газетаси хабар қилишича, полиция Цяннинг шахсий кундалигини ҳам топган. Унда аёл ўзини Далай Лама томонидан мойланган “қайта туғилган маъбуда” сифатида кўргани, ҳатто “Либерланд” номли ўзига хос подшоҳлик ташкил этиб, унда малика сифатида ҳукмронлик қилишни орзу қилгани ёзилган.

Ҳозирда жиноятчи аёл ҳибсга олинган ва ўз айбини тан олган ҳолда суд ҳукмини кутмоқда. Бу иш нафақат молиявий фирибгарликлар, балки криптовалюта орқали жиноятларнинг қанчалик кўламли бўлиши мумкинлигини яна бир бор намоён этди.