Прокурорлар рэпер P.Diddi учун 11 йил талаб қилди
Reuters’нинг ёзишича, федерал прокурорлар машҳур рэпер P.Diddi (Шон Комбс)ни 11 йилга озодликдан маҳрум этиш ва 500 минг доллар жарима билан жазолашни сўраб судга мурожаат қилди.
Суд материалларида қайд этилишича, айблов томони Дидди учун “энг камида 135 ойлик қамоқ жазоси”ни талаб қилган. Унга нисбатан якуний ҳукм 3 октябрь, жума куни Нью-Йоркда эълон қилиниши кутиляпти.
Шу билан бирга, P.Diddi’нинг адвокатлари рэперга нисбатан анча енгилроқ жазо тайинланишини истаб, уни 14 ойдан зиёд бўлмаган муддатга қамашни сўрашган. Улар шунингдек, судгача ўтказган бир йиллик қамоқ муддатини умумий жазога қўшиб ҳисоблаш кераклигини таъкидлаган.
Эслатиб ўтамиз, июль ойи бошида ҳукм чиқарган ҳакамлар ҳайъати Диддини аёлларни фоҳишаликка жалб қилиш учун ташиш айбловида айбдор деб топган. Бироқ у жиноятчиликка раҳбарлик қилиш ва жинсий савдо билан боғлиқ оғирроқ айбловлардан оқланди.