Алексей Песошин өлкән буынны Халыкара өлкәннәр көне белән котлады
Татарстан Республикасы Премьер-министры Алексей Песошин ветераннарны һәм өлкән буын вәкилләрен Халыкара өлкәннәр көне белән котлады.
«Чын күңелемнән сезне зирәклек һәм игелек бәйрәме белән котлыйм! Бүген без Сезгә, хезмәтләре республикабыз байлыгының һәм чәчәк атуының нигезе булган кешеләргә, тирән ихтирамыбызны һәм рәхмәтебезне белдерәбез. Сез – безнең бәһасез байлыгыбыз, традицияләрне һәм рухи кыйммәтләрне саклаучылар, үз тәҗрибәләрен яшь буыннарга тапшыручылар. Сезнең тормыш зирәклегегез, үҗәтлегегез һәм хезмәт сөючәнлегегез тирән хөрмәткә лаек һәм безнең барыбыз өчен дә үрнәк булып тора.
Безнең республикада өлкән буынга ярдәм итү программалары гамәлгә ашырыла, тормыш сыйфатын яхшыртуга юнәлдерелгән социаль сервислар үсә. Без сезнең тормышыгыз игътибар һәм җылылык белән тулы булсын өчен шартлар тудырырга омтылабыз. Сезнең күбегезнең актив тормыш алып баруын, иҗтимагый эшчәнлектә катнашуын күрү сөендерә. Сезнең энергиягез һәм оптимизмыгыз безне яңа казанышларга рухландыра.
Тормышыгыз тыныч һәм шатлыкларга бай, туганнарыгыз һәм дусларыгызның игътибары белән тулы булсын. Чын күңелдән Сезгә нык сәламәтлек, озын һәм бәхетле гомер, иминлек һәм җан тынычлыгы телим! Һәр көнне якыннарыгызның кайгыртуын һәм җылысын тоеп яшәгез!» - дип яза ТР премьер-министры.
Өлкәннәр көне ел саен 1 октябрьдә билгеләп үтелә. Бәйрәм 1990 елда БМО Генераль Ассамблеясе тарафыннан гамәлгә куелган. Төп максат – өлкән яшьтәге кешеләр очраша торган проблемаларга игътибарны җәлеп итү һәм аларның җәмгыять үсешенә керткән өлешләрен билгеләү.