Рөстәм Миңнеханов Усад авылында «Тәрбия үзәге» белем бирү үзәгендә булды
Татарстан Республикасы Рәисе Рөстәм Миңнеханов Лаеш районының Усад авылына эш сәфәре кысаларында яңа ачылган «Тәрбия үзәге» белем бирү үзәгендә булды. Бу хакта ТР Рәисенең матбугат хезмәте хәбәр итә.
Үзәк «Ихлас» мәчете комплексы территориясендә урнашкан һәм хәйриячеләр акчасына төзелгән. Учреждениедә 100 укучыга исәпләнгән тугыз уку кабинеты, шулай ук төрле чаралар үткәрү өчен 200 кеше сыйдырышлы күп функцияле зал җиһазландырылган.
Сәфәр барышында республика лидеры үзәкнең матди-техник җиһазланышы, кулланыла торган белем бирү методикалары һәм эшнең төп юнәлешләре белән танышты.
«Тәрбия үзәге»нең эшчәнлеге татар телен, милли мәдәниятне саклауга һәм популярлаштыруга аерым игътибар биреп, балалар һәм яшьләрнең күпкырлы үсеше өчен заманча белем бирү мохите булдыруга юнәлдерелгән.
Үзәктә телләрне (татар, инглиз, гарәп, кытай) өйрәнү, техник дисциплиналар (программалаштыру һәм робототехника), шахмат дәресләре, мәдәни тәрбия, китап клублары, мәктәпкә һәм БДИга әзерлек программалары, шулай ук һөнәри юнәлеш бирү чаралары гамәлгә ашырыла.
Миңнехановка шулай ук Лаеш эшкуарлары гамәлгә ашыра торган социаль проектлар (шул исәптән тарихи төбәкләр территориясендә дә) турында сөйләделәр.