Brann-trenaren før Utrecht-kampen: – Galskap
– Viss me presterer vårt beste kan me slå alle, spesielt på heimebane, seier Brann-trenar Freyr Alexandersson på pressekonferansen før torsdagens kamp.
Brann skal spele sin andre kamp i ligaspelet i Europaligaen mot nederlandske Utrecht.
I den fyrste kampen blei det eit knipent 1-2-tap mot franske Lille. Trenaren er ikkje einig med dei som meiner at den gode prestasjonen hadde null verdi sidan Brann treng alle poenga dei kan få om dei skal vidare i ligaspelet.
– Det er galskap å seie at kampen mot Lille ikkje hadde noko verdi sidan det enda med tap. Me får mykje ut av kvar kamp, seier Alexanderrson.
Han møtte pressa i lag med keeper Mathias Dyngeland, onsdag.
Alexandersson meiner Brann har blitt betre dei siste månadane og har utvikla seg bra.
– Me har blitt dyktigare på mange område, legg han til. (NRK/NTB)