Төмән өлкәсе имамнары һәм дини оешмалар җитәкчеләре өчен семинар узды
Төмән өлкәсе мөселманнары Диния нәзарәте төбәк имамнары һәм дини оешмалары җитәкчеләре өчен квалификация күтәрү курслары кысаларында семинар уздырды. 29 сентябрьдән 1 октябрьгә кадәр мөселман руханилары өчен ислам дисциплиналары, дин белеме, конфессияара һәм милләтара мөнәсәбәтләр, хәләл индустрия буенча лекцияләр оештырылды. Бу хакта Россия мөселманнары Диния нәзарәтенең матбугат хезмәте хәбәр итә.
Дин тотучыларның галимнәргә, дин әһелләренә карата әдәп (үз-үзеңне тоту) кагыйдәләре мөһим темаларның берсе булды. Ислам фәннәре докторы, Казан ислам университетының дини фәннәр кафедрасы өлкән укытучысы Рәшит Сибгатуллин әлеге блокның спикеры сыйфатында чыгыш ясады. Ул дин тотучыларның гайбәт сөйләгән һәм яла яккан өчен җаваплылыгын искәртте, хокук саклау органнарына үз хокукларыңны яклап мөрәҗәгать итәргә рөхсәт ителүен әйтте. Лекторлар Россиядә ислам үсеше тарихы турында да сөйләде.