Эрон пойтахтини Теҳрондан кўчириш: Экологик ва иқтисодий зарурат

Эрон президенти Масъуд Пезешкиён Ҳўрмузгон вилояти тадбиркорлари билан ўтказган учрашувда мамлакат пойтахтини Теҳрондан кўчириш масаласини яна кўтарди. Унинг сўзларига кўра, пойтахтни Теҳрондан кўчириш — бу танлов эмас, балки заруратдир.

«Мен Олий раҳбарга (Али Хоманаий) пойтахтни Форс кўрфази томонга кўчириш зарурлигини айтдим. Бошқа иложимиз йўқ, шунга мажбурмиз, шу кетишда давом этсак, муаммолар кўпаяди. Сув захираларимиз кундан-кунга камаймоқда, сўнгги пайтларда ернинг чўкиши кузатиляпти. Теҳроннинг баъзи ҳудудларида чўкиш 30 сантиметрга етди», — деди Эрон президенти.

Пезешкиён президент бўлганидан буён пойтахтни кўчириш ҳақида кўп марта гапирган. Унинг фикрича, мамлакатнинг бош шаҳри жанубда, денгиз бўйида жойлашиши керак. Бу нафақат иқтисодий ва сиёсий, балки экологик масала ҳамдир. Теҳрондаги сув танқислиги, ҳаво ифлосланиши ва тупроқнинг чўкиши каби улкан муаммолар, шубҳасиз, муҳим аҳамиятга эга бўлган масалаларга айланган.

Теҳрон — Эроннинг энг катта шаҳри бўлиб, аҳолиси 13 миллиондан ошади. 1795 йилдан буён мамлакатнинг пойтахти ҳисобланади. Пойтахтни бошқа жойга кўчириш масаласи Эронда ўз вақтида бир неча бор муҳокама қилинган, 2009, 2013 ва 2017 йилларда ҳам бу мавзудаги баҳслар кун тартибига чиқарилган.

Эрон президентининг бугунги кундаги таклифлари, шаҳарни кўчириш заруриятини янада очиқ-ойдин кўрсатмоқда. Пойтахтни Форс кўрфазига кўчириш, нафақат мамлакат иқтисодиёти, балки экологик барқарорлик ва узоқ муддатли сув захираларини сақлаб қолиш учун ҳам муҳим қадам бўлади.