Нетфлих ва BBC «Peaky Blinders» давомини ишлаб чиқмоқда

Машҳур«Peaky Blinders» сериали янгидан давом эттирилади. Нетфлих ва BBC ҳамкорлигида ишлаб чиқилаётган янги спин-офф 1953 йилдаги Буюк Британия ҳаётини ва Шелби оиласининг янги авлодини намоён этади. Variety хабар беришича, лойиҳа камида икки мавсумдан иборат бўлади.

Сюжетга кўра, Иккинчи жаҳон урушидаги қирқимли бомбардимонлардан кейин Бермингем бетон ва пўлатдан янги келажак қуришга киришади. Бироқ шаҳарнинг улкан қайта қуриш дастури учун олиб борилган кураш қаҳратон рақобатга айланиб, афсонавий кўламдаги тўқнашувларга олиб келади.

Сериалнинг асосий актёрлари ҳозирча ошкор қилинмаган. Бироқ, асл «Peaky Blinders»да Томас Шелби образини жонлантирган Киллиан Мёрфи лойиҳага ижрочи продюсер сифатида қайтиши маълум. Шунингдек, сериал яратувчиси Стивен Найт ҳам иш жараёнида иштирок этади.

Аввалроқ Найт Киллиан Мёрфи қаҳрамони яна экранга чиқишини маълум қилган эди.

Эслатиб ўтамиз, «Peaky Blinders»нинг олтинчи мавсуми 2022 йилда эфирга узатилган. Якуний еттинчи мавсум ўрнига, Найт Томми Шелби ва унинг жиноий тўдаси ҳақидаги қиссани тўлиқ метражли фильм орқали якунлашга қарор қилган.

Сериал илк бор 2013 йилда намойиш этилган ва қисқа вақт ичида оммалашган. Беш йил ўтиб, у BAFTA томонидан «Энг яхши Британия шоуси» деб топилган, орадан бир йил ўтиб эса Миллий телевидение мукофотини «Энг яхши драматик сериал» номинациясида қўлга киритган.