Ҳиндистонда йўтал сиропларига тақиқ киритилди
Ҳиндистонда сўнгги бир ой ичида Маҳараштра ва Мадҳя Прадеш штатларида камида 14 нафар боланинг ҳаётига зиён етгани сабабли, йўталга қарши сиропларни вақтинча тақиқлашга қарор қилинди. Болаларда дастлаб шамоллаш аломатлари кузатилгани, кейинчалик уларнинг аҳволи оғирлашиб, буйрак етишмовчилиги ва ҳушдан кетиш ҳолатлари қайд этилган.
Тақиқланган сироплар болаларнинг уйидан топилган ва уларнинг хавфсизлиги текширилганидан кейин, сотилиши тўхтатилган. Мутахассислар ушбу сиропларда заҳарланишни ёки камёб Чандипура вируси сабаб бўлиши мумкинлигини тахмин қилишмоқда.
Ҳозирда 22 та сироп партияси тақиқланган. Ражастан штатида ҳам бир неча бола ушбу сиропларни истеъмол қилгандан сўнг вафот этган, ҳатто бир шифокор сиропнинг хавфсизлигини текшириш учун ичиб, ҳушидан кетган.
2022 йилда Ўзбекистонда ҳам Ҳиндистонда ишлаб чиқарилган "Док-1 Макс" йўтал сиропи сабаб 69 нафар боланинг ҳалок бўлгани маълум. Шундай қилиб, ҳозирда болаларга зарар етказиш эҳтимоли бўлган препаратларга бўлган назорат янада кучайтирилган.