Сирдарёда икки ИИБ ходими пора олаётганда ушланди
Жорий йилнинг октябрь ойида Сирдарё вилояти Ховос туманида жойлашган боғдорчилик хўжалигига тегишли дала майдонидан полиэтилен қоплар ўғирлангани юзасидан Ички ишлар бўлимига мурожаат келиб тушди. Мазкур мурожаат асосида ИИБ Тезкор-қидирув бўлимининг подполковник ва майор унвонидаги икки нафар катта ходими текширув бошлаган.
Ўғирликда гумон қилинган тўрт нафар фуқаро мажбуран ИИБга олиб борилиб, қамаб юбориш билан қўрқитилган. Терговни тўхтатиш, яъни ишни “босди-босди” қилиш эвазига улардан дастлаб 55 миллион сўм сўралган. Бу ҳақда Давлат хавфсизлик хизмати расмий маълумот берди.
Орадан кўп ўтмай, терговчиларнинг ўзи “зарарни қоплаш” баҳонасида 24 миллион сўмни олади. Кейинчалик эса, жиноят иши очмаслик, ҳибсга олиш чораси қўлламаслик ва ҳужжатларни фақат маъмурий жавобгарлик доирасида расмийлаштириб, судга юбориш эвазига қўшимча 11 миллион сўм талаб қилишади.
ДХХнинг Сирдарё вилояти бошқармаси, прокуратура ҳамда ИИВ Шахсий хавфсизлик бўлими ҳамкорлигида ўтказилган тезкор тадбирда ушбу катта тезкор ходимлар поранинг 11 миллион сўмини олаётган пайтда ушланган. Улар қўлга олинган ва Жиноят кодексининг 210-моддаси 2-қисми "в" ва "г" бандлари билан иш қўзғатилган.