Экология ва туризм бўйича янги тузилмалар ташкил этилади
Ўзбекистон Президенти Шавкат Мирзиёев туризм қўмитаси ва Экология вазирлигини қайта ташкил этиш тўғрисида қарор қабул қилди, деб хабар берди давлат раҳбари матбуот хизмати. Туризм қўмитаси алоҳида орган сифатида ажратилади.
Шу билан бирга, вазирлик негизида Миллий экология ва иқлим ўзгариши қўмитаси ташкил этилади ва у Вазирлар Маҳкамаси таркибидан чиқарилади. Ушбу қўмитага президентнинг экология масалалари бўйича маслаҳатчиси раҳбарлик қилади.
Янги экология қўмитаси «Чиқиндиларсиз ҳудуд», «Тоза ҳаво», «Яшил макон», «Экокултура» ва «Бионаслдорлик» каби миллий лойиҳаларни амалга ошириш билан шуғулланади. Шунингдек, қўмита таркибида «Эколойиҳалар фабрикаси» ва Экологик полиция ташкил этилади.
Алоҳида қарорда Миллий экологик мониторинг маркази фаолиятини ташкил этиш масалалари кўриб чиқилган. 2026 йил сентябр ойига қадар экология бўйича ягона онлайн платформа ишга туширилади.
I ва II тоифадаги корхоналар 2026 йил 1 мартга қадар фон мониторинги станцияларини ўрнатиши шарт. Акс ҳолда, компенсация тўловлари беш бараварга оширилади.
Шу санадан бошлаб қонунда белгиланганларидан ташқари барча экологик компенсация имтиёзлари бекор қилинади. Дарахтларни кесиш ёки кўчириш бўйича рухсатномалар бериш қоидалари ҳам қатъийлаштирилади: экологик талабларни бузган ҳолда ҳеч қандай қарор қабул қилиш тақиқланади.
Экологик полиция ходимларига махсус воситалар ва хизмат қуролини қўллаш ҳуқуқи берилади, улар махсус камерали формалар билан таъминланади. 2026 йил апрел ойидан бошлаб фуқаролар ўрмон фондига кирмайдиган дарахтлар ўсадиган аҳоли пунктлари ерларини олиб қўйишга қарши ташаббус кўрсатиш имкониятига эга бўлади.