Ҳибсхоналарда сайр вақти ва харажат лимити оширилади
Ўзбекистонда ҳибсда сақланаётган шахслар ҳуқуқларини кенгайтиришга қаратилган янги тартиблар жорий этилиши кутилаяпти. 18 ноябрь куни Олий Мажлис Қонунчилик палатаси қонун лойиҳасини биринчи ўқишда маъқуллади.
Лойиҳа тергов ҳибсхоналаридаги шароитни яхшилаш, амалдаги қоидаларни халқаро стандартларга яқинлаштириш ва инсонпарвар ёндашувни кучайтиришни мақсад қилади.
Янгиликларнинг энг муҳим қисми — очиқ ҳавода бўлиш вақти ва молиявий харажат лимити оширилаши. Мавжуд тартибга кўра, маҳкумлар кунлик сайр учун камида бир соат ажрата оларди. Янги нормалар қабул қилинса, дам олиш ва байрам кунларида уларга камида икки соат сайр қилиш ва жисмоний машқлар билан шуғулланиш имкони берилади.
Молиявий чекловлар ҳам қайта кўриб чиқилади. Ҳозирда маҳкумлар ўз эҳтиёжлари учун энг кам ойлик иш ҳақининг 50 фоизи — 635 500 сўмгача маблағ сарфлаши мумкин. Қонун кучга кирса, лимит 100 фоизга, яъни 1 271 000 сўмгача кўтарилади.
Ҳужжат тергов изоляторларидаги турмуш шароитларини яхшилашга қаратилган бир қатор қўшимча нормаларни ҳам ўз ичига олади. Омбудсман фикрича, бу ўзгаришлар инсонпарварлик тамойилларини мустаҳкамлаб, миллий қонунларни халқаро тажрибаларга яқинлаштиришга хизмат қилади.