Денов ва Чироқчи ҳокимлари ишдан олинди

Узун тумани жорий йилда камбағалликни қисқартириш ва бандликни оширишда юқори натижаларга эришгани боис намунавий ҳудуд сифатида эътироф этилди. Туманга ажратилган 160 миллиард сўм маблағ, 70 миллион долларлик хорижий инвестиция ва ишга туширилган 47 та янги корхона орқали минглаб аҳоли бандлиги таъминланди. Натижада, камбағаллик даражаси 10,5 фоиздан 3 фоизга камайди.

Бунга қарши, Денов туманида ажратилган маблағлар мақсадли сарфланмагани танқид қилинди. Камбағал оилалар реестридаги 1 200 та оиланинг даромадида ўзгариш кузатилмагани ҳокимликнинг самарасизлигини кўрсатди. Туман Узунга нисбатан 4,5 баробар кўп ресурс олганига қарамай, натижа етарли бўлмади.

Чироқчи туманида эса тадбиркорликни ривожлантириш учун 309 миллиард сўм кредит ресурслари ажратилганига қарамай, ҳокимият аҳолига имкониятига мос тайёр лойиҳалар тақдим этмагани қайд этилди. Бу туман раҳбарияти ажратилган маблағлардан оқилона фойдаланмаганини кўрсатади.

Шу камчиликлар сабабли Денов ҳокими И. Аброров ва унинг биринчи ўринбосари Ш. Тўрақулов ҳамда Чироқчи ҳокими Ф. Юсупов ва унинг биринчи ўринбосари З. Эргашев лавозимидан озод қилинди. Қарор ҳудудларда ижтимоий-иқтисодий дастурларнинг тўлиқ ижросини таъминлашга қаратилган.