Adnoc компанияси Ўзбекистондаги Лукойл активларига қизиқмоқда
БААнинг давлат компанияси Abu Dhabi National Oil Co. (Adnoc) Лукойлнинг хориждаги турли активларига, айниқса, Ўзбекистондаги газ лойиҳаларига катта қизиқиш билдирмоқда. Бу ҳақда Bloomberg хабар берди.
Американинг Exxon Mobil ва Chevron компаниялари эса Лукойлнинг Ироқда жойлашган йирик West Qurna-2 лойиҳасидаги улушини сотиб олишни кўриб чиқмоқда.
Лукойл активларига бўлган қизиқиш АҚШнинг 13 декабрдан кучга кириши кутилган санкциялари фонида ошди. Ушбу санкциялар сабаб компания халқаро бизнесини сотишни тезлаштирмоқда.
Харидорлар турли йўналишларни ўрганмоқда, бироқ Лукойл халқаро активларини ягона пакет сифатида сотишни маъқул кўради. Аввалроқ компания халқаро активларини Gunvor трейдерига сотишга уринган эди, бироқ АҚШ бу битимни блоклаган.
Манбаларнинг айтишича, айрим потенциал инвесторлар фақат алоҳида лойиҳаларни сотиб олишни истамоқда. Шу сабабли аввал бир молиявий ўйинчи бутун пакетни сотиб олиб, кейинчалик уни алоҳида бўлиб сотиши эҳтимоли ҳам истисно қилинмаган.
Adnoc БААнинг энг йирик нефть-газ корпорацияси бўлиб, мамлакатнинг нефть ва газ қазиб олиш, қайта ишлаш ҳамда экспорт қилиш жараёнларини бошқаради. Бу дунёнинг энг нуфузли энергетика компанияларидан бири бўлиб, халқаро лойиҳалардаги улушларни сотиб олиш ва инвестициялар орқали чет элдаги иштирокини фаол кенгайтирмоқда.