Таремининг кескин танқиди Эрон футболини ларзага солди
Эрон терма жамоаси етакчи ҳужумчиси Меҳди Тареми Al Ain Cup мусобақасидаги мағлубиятдан кейин жамоадошлари ва мамлакатдаги футбол тизими ҳақида жуда қаттиқ фикрлар билдириб, катта баҳсларга сабаб бўлди. Ўзбекистон терма жамоаси камчилик бўлиб ҳам Эронни пенальтилар сериясида таслим этди ва айнан шу ўйиндан кейин вазият янада чуқурлашди.
Маълум бўлишича, пенальтиларни ким амалга ошириши кераклиги бевосита Таремига топширилган — бу ҳуқуқни унга бош мураббий Амир Ғалинои берган. Бироқ серия давомидаги омадсизликдан сўнг Тареми жамоадошларининг муносабатини қаттиқ танқид қилди.
Унинг айтишича, 10 нафар футболчи пенальти тепишдан бош тортган ва масъулиятни ўз зиммасига олишдан қўрққан:
«Биз икки марта пенальти машқ қилдик. Ўшанда ҳам тўпни фақат тўрт марта дарвозабонимиз қайтара олганди. Бугун эса жамоадошларимнинг кўпчилиги масъулиятдан қочишди. Агар Ўзбекистонга қарши пенальтини тепа олмасак, унда бундай футболчидан Жаҳон чемпионатида қандай фойда?» — дейди у.
Таремидан нима учун ўзи тепмагани ҳақида сўрашганда эса у шундай жавоб берди:
«Мен ўзимга тегишли пенальтиларимни ўша вақтгача амалга ошириб бўлгандим. Бу фақат пенальти масаласи эмас. Эрон футболидаги структура жиддий бузилган».
Шу билан ҳам чекланмаган Тареми мамлакатдаги сиёсий муҳитнинг футболга босим ўтказаётганини ҳам очиқ танқид қилди. Унинг фикрича, сўнгги йилларда футболни ривожлантириш ўрнига аксинча уни заифлаштириш жараёни кетмоқда.
«Охирги 2–3 йилда футболни йўқ қилиш бошланди. “Зобаҳан” — “Сепахон” ўйинига қандай қилиб бор-йўғи 2000 киши келиш мумкин? Озоди стадиони тўрт йилдан бери таъмирда. "Истиқлол" ва "Персеполис" эса 8000 ўринли майдонда ўйнашга мажбур», — дейди у.
Футболчининг фикрича, бундай ҳолатлар ортида бир неча минг томошабиннинг бир жойга йиғилишидан қочиш сиёсати бор:
«Агар мақсад 50–60 минг кишини йиғилтирмаслик бўлса, нима учун футболни қурбон қиляпсизлар? Бизга яхши майдонлар беринг, шундан кейин натижа талаб қилинг. Футболни ўлдириш керак эмас — дунёда у доимо энг глобал ўйин бўлиб қолаверади».
Таремининг бу баёноти нафақат Эрон футболида, балки оммавий ахборот воситаларида ҳам катта муҳокамага айланди. Терма жамоа ичидаги масъулият, тузумдаги камчиликлар ва мухлислар учун яратилган шароитлар масаласи яна кун тартибига қайтди. Мазкур танқиддан кейин Эрон футболида қандай ўзгаришлар бўлиши эса ҳозирча номаълум.