Трамп Роналдуни Оқ уйда алоҳида эътиборда қарши oлди (видео)
Португалия футболи афсонаси Криштиану Роналду яна бир бор дунёнинг энг нуфузли саҳналарида марказий фигурага айланди. У бу сафар фахрий меҳмон сифатида АҚШ президенти Дональд Трамп уюштирган тантанали кечки овқатга таклиф этилди. Тадбир 18 ноябр куни Оқ уйда Саудия Арабистони валиаҳд шаҳзодаси Муҳаммад ибн Салмон шарафига ўтказилди ва маросимда дунё миқёсидаги нуфузли шахслар иштирок этди.
Ҳозир Саудиянинг “Ан-Наср” клуби сафида тўп суриб келаётган Роналду шундай муҳим зиёфатда Apple раҳбари Тим Кук ҳамда Tesla асосчиси Илон Маск каби бизнес оламининг энг йирик намояндалари орасида ўтирди. Бу ҳам унинг ҳали ҳам глобал миқёсдаги эътибор марказида эканини яна бир карра исботлади.
Учрашув вақтида Трамп Роналдуга таклифни рад этмай келгани учун самимий миннатдорчилик изҳор қилди. Шу билан бирга, ўзининг 19 ёшли ўғли Бэррон футболчининг ҳаваскор мухлиси эканини очиқ айтиб, ҳазиломуз тарзда қўшимча қилди:
— Менинг ўғлим Криштиану Роналдунинг катта фанати. Роналду эса шу ерда, — деди у залдаги қарсаклар остида. — Энди уларни учраштирганим учун Бэррон мени янада кўпроқ ҳурмат қилса керак.
Трамп Роналдуни барча даврларнинг энг зўр футболчиси – G.O.A.T. деб ҳам атади. Бу таъриф, табиийки, жамоатчилик орасида яна катта муҳокамага сабаб бўлди.
Айтиш жоизки, АҚШ 2026 йил ёзги Жаҳон чемпионатига мезбонлик қилади. Португалия термаси ҳам мундиалга йўлланма олгани маълум бўлган. 40 ёшли Роналду учун эса бу бошқа мундиаллардан фарқли, эҳтимол фаолиятидаги сўнгги мусобақа бўлиши мумкин.
Унинг Оқ уйдаги иштирокиданоқ кўриниб турибдики, Криштиану ҳали ҳам нафақат футбол майдонида, балки глобал спорт-сиёсий саҳнада ҳам эътибор марказида қолмоқда.