Боксшы Жәнібек Әлімханұлы допинг қолданды деген күдікке ілінді
Қазақстандық кәсіпқой боксшы Жәнібек Әлімханұлы допинг қолданды деген күдікке ілінді. 7 желтоқсан күнгі жекпе-жек алдында ол допинг тестінен өте алмады. Дүниежүзілік бокс ұйымы (WBO) допингке қарсы қауымдастықтан (Voluntary anti-doping association) орта салмақтағы чемпион Жәнібек Әлімханұлының талдау нәтижесі дұрыс болмай шыққаны жөнінде мәлімет алынғанын хабарлады.
"WBO ережелері мен регламентіне сәйкес және адалдық, спортшылардың қауіпсіздігі мен әділ бәсекелестікті жақтайтынымызды растай отырып, WBO өзінің ішкі тергеу процесін бастайды" деп жазылған хабарламада.
Сенбі, 6 желтоқсанда Жәнібек Әлімханұлы Лара Эрисландимен жекпе-жекке шығуы керек болған. Талдау осы сайыстың алдында спорт ережесіне сай жүргізілген.
Жәнібек Әлімханұлының өзі Instagram желісінде дауға түсініктеме берді.
"Мен әрқашан таза спортты қолдаймын. Мұны жақсы білесіздер. Мен таза спортты насихаттап жүргенімді де білесіздер. Жаңалықты оқып таң қалып отырмын. VADA бірінші рет анализ алып бәрі таза деп еді. Мен витаминдеріме де тамағыма да ешқандай өзгеріс енгізбедім. Екінші рет тестте неге мұндай болғанын түсінбей отырмын, біз қайта анализ тапсыруға өтініш айттық. Жауабын күтіп отырмыз!" деп жазды.
Осы даудан кейін оның алдағы жекпе-жегі өтпейтіні белгілі болды. Енді Лара Эрисландимен 34 жастағы колумбиялық боксшы Йохан Гонсалес бокстасады.
Спорт басылымдарының жазуынша, 42 жастағы Эрисланди Лара соңғы рет рингке былтыр шығып, Дэнни Гарсияны мерзімінен бұрын жеңген. Ал Жәнібек Әлімханұлы соңғы төрт кездесуін нокаутпен аяқтап, өзінің салмақтағы қарқынын айқын көрсеткен.