Бен-Гурионда ўзбекистонликлар сохта паспорт билан қўлга олинди
Исроилнинг Бен-Гурион аэропортида икки нафар ўзбекистонлик сохта Исроил паспортлари билан мамлакатга киришга уринган пайтда қўлга олинди. Бу ҳақда Исроилнинг Cursorinfo нашри хабар берди.
Нашр маълумотларига кўра, жами 16 киши сохта ҳужжатлар билан ушланган, улардан икки нафари ўзбекистонлик бўлса, қолган 14 нафари грузиялик фуқаролардир. Текширув давомида паспортларнинг айримлари Исроилнинг вафот этган фуқаролари номига расмийлаштирилгани аниқланган.
15 нафар шахс Сочидан, яна бир киши эса Тбилисидан учиб келган. Улар паспорт назорати вақтида қўлга олиниб, сўроқ қилинган. Cursorinfo хабарига кўра, ушланганлар Исроилда ноқонуний ишлаш мақсадида келганликларини тан олишган.