Støre om VM-skjenking: Du skal få drikke opp ølen

Statsminister Jonas Gahr Støre (Ap) seier regjeringa vil finne ei løysing som gjer det mogleg å sjå Noreg sine VM-kampar om natta og få kjøpt øl heilt til kampen er ferdig.

– Sit du på ein pub eller ser kampen med vener, skal du få sjå kampen ferdig, drikke opp ølen og gjerne kjøpe ein til, seier Støre i Politisk kvarter.

Støre seier det er utfordringar knytte til at kampane går i ei anna tidssone, men at dette skal bli løyst.

– Då får vi rette opp i det, seier han.

Støre seier detaljane kjem seinare, men at ordninga skal gjelde dei norske kampane.

Høgre meiner regjeringa er for vage.

– Eg meiner Støre bør seie rett ut at han vil sikre at utestadene kan servere øl etter klokka 03.00. Det er ingen grunn til å mumle rundt dette, seier stortingsrepresentant Erlend Svardal Bøe (H).

Han meiner regjeringa må gjere nødvendige endringar i god tid før fotball-VM, for å unngå problem når kampane skal bli spelt.