Йўловчи ҳаракати сабаб метро поезди эшиклари ишдан чиқди
Тошкент метросида йўловчилар хавфсизлигига таҳдид солган ҳолат қайд этилди. 16 декабрь куни “Мустақиллик майдони” бекатидан “Пахтакор” томон ҳаракатланиши керак бўлган поездда йўловчилардан бири вагон эшиклари ёпилаётган пайтда куч билан очишга уринган.
Оқибатда эшикни ҳимоя қилувчи механизм ишдан чиққан. Машинист муаммони жойида бартараф этган бўлса-да, носозлик қисқа фурсат ичида яна такрорланган. Шундан сўнг хавфсизлик қоидаларига мувофиқ, йўловчилар бекатга туширилиб, поезд электродепога юборилган.
“Тошкент метрополитени” матбуот хизмати йўловчиларни метро қоидаларига қатъий риоя қилишга чақириб, бундай беэътибор ҳаракатлар нафақат мулкка зарар, балки инсон ҳаёти учун ҳам жиддий хавф туғдиришини таъкидлади.