Наманган ва Жиззахда маҳкумларга тиббий ёрдам кечиктирилган
Наманган ва Жиззах вилоятларида маҳкумларга тиббий ёрдам ўз вақтида кўрсатилмаган ҳолатлар жамоатчилик эътиборини тортди. Ўзбекистон Республикаси Олий Мажлиси ҳузуридаги Инсон ҳуқуқлари бўйича вакил — Омбудсман ушбу ҳолатларни назоратга олди.
Маълум бўлишича, Жиззах вилоятидаги 29-сон манзил-колонияда сақланаётган маҳкум оғир аҳволда бўлишига қарамай, икки кун давомида тўлиқ тиббий ёрдам ола олмаган. У юқори ҳарорат ва иситма билан бир неча тиббиёт муассасаларига олиб борилган, аммо айрим жойларда тўлов ёки йўлланма талаб қилинган, бошқаларида эса мутахассис шифокор йўқлиги сабабли қабул қилинмаган. Кейинчалик унда ўпка билан боғлиқ оғир касалликлар аниқланган.
Омбудсман аралашувидан сўнг маҳкум зудлик билан шошилинч тиббий ёрдам марказига етказилиб, стационар даволанишга жойлаштирилган. Зарур муолажалардан кейин дори-дармон билан таъминланган.
Шунингдек, текширувлар давомида Жиззах шаҳар вақтинча сақлаш ҳибсхонасида ва Наманган вилоятидаги тергов ҳибсхонасида ҳам тиббий ёрдам билан боғлиқ муаммолар аниқланган. Хусусан, ҳомиладор маҳкума тиббий кўрик ва даволаниш масаласида мурожаат қилган.
Барча ҳолатлар Омбудсман томонидан алоҳида назоратга олиниб, тегишли чоралар кўрилмоқда. Ҳуқуқни ҳимоя қилиш органлари маҳкумларнинг соғлиғи давлат ҳимоясида эканини таъкидламоқда.