Туркия меҳмонхоналари “ҳаммаси киритилган” тизимидан воз кечмайди
Келгуси туризм мавсуми арафасида Туркия меҳмонхоналари машҳур “ҳаммаси киритилган” дам олиш тизимини бекор қилишни режалаштирмаяпти. Бу ҳақда Анталия туризм соҳаси вакиллари расман маълум қилди ва охирги пайтларда тарқалаётган миш-мишларга ойдинлик киритди.
Мутахассисларнинг айтишича, мамлакатда эрта брон қилиш кампаниялари аллақачон старт олган. Ҳозирча турпакетлар нархи туристлар учун нисбатан мақбул даражада ушлаб турибди. Бироқ бозор иштирокчилари инфляциянинг юқори суръатлари ва харажатларнинг ошиб бораётганини инкор этмаяпти. Шу сабабли, келгуси мавсумда сайёҳлар учун рақобат янада кескинлашиши кутилмоқда.
Туркия туризм индустрияси ҳозирги иқтисодий шароитларга мослашишга мажбур. Талабни сақлаб қолиш, хорижий меҳмонларни жалб этиш учун янги ишлаш усуллари, хизматлар сифати ва таклиф форматлари устида иш олиб борилмоқда. Шунга қарамай, “ҳаммаси киритилган” тизимини тўлиқ бекор қилиш режада йўқ.
Манбалар таъкидлашича, мазкур формат ҳақида оммавий ахборот воситаларида вақт-вақти билан пайдо бўлаётган танқидий фикрлар меҳмонхона эгалари умумий позициясини акс эттирмайди. Аксинча, бу тизим ҳали ҳам Туркия туризмининг асосий рақобат устунликларидан бири бўлиб қолмоқда.
Аввалроқ айрим соҳа вакиллари ушбу дам олиш шаклининг келажаги юзасидан турлича фикр билдирган эди. Хусусан, Туркия Кичик меҳмонхоналар уюшмаси раҳбари Эртон Устоғлу “ҳаммаси киритилган” тизими сайёҳларни меҳмонхона ҳудудида ушлаб қўйиши ва мамлакатнинг маданий, тарихий жойлари билан танишиш имкониятини чеклашини таъкидлаган.
Шунга қарамасдан, ҳозирча Туркия меҳмонхоналари учун энг оммабоп ва талаб юқори бўлган формат ўз кучида қолмоқда. Туризм бозори эса янги чақириқларга мослашган ҳолда ишлашда давом этмоқда.