Модрич FIFA The Best учун учликни Мбаппесиз танлади
Хорватия терма жамоаси сардори Лука Модрич FIFAнинг йилнинг энг яхши футболчиси бўйича The Best соврини учун овоз берди. Маросим сешанба куни бўлиб ўтди ва умумий овоз бериш якунларига кўра, соврин «ПСЖ» ҳужумчиси Усмон Дембелега насиб этди.
40 ёшли Модрич, ҳозир «Милан» сафида тўп сураётган бўлса-да, шахсий рейтингида биринчи ўринга «ПСЖ» ярим ҳимоячиси Витинияни қўйди. Иккинчи поғонани Дембеленинг ўзи эгаллади, учинчи ўринга эса «Барселона»нинг ёш юлдузи Ламин Ямал жой олди.
Эътиборлиси, Модричнинг учлигидан Килиан Мбаппе ўрин олмади. Модрич Мбаппе билан жорий йил ёзигача Мадриднинг «Реал» клубида бирга ўйнаган.
Дарвозабонлар бўйича Модрич «Реал»даги собиқ жамоадоши Тибо Куртуани эмас, «ПСЖ» посбони Жанлуижи Доннаруммани энг яхшиси деб билдирди. Куртуа иккинчи ўринни олди, учинчи поғонани эса «Ливерпул» дарвозабони Алисон Бекер банд этди.