Гарри Кейн «Бавария»нинг Чемпионлар лигаси режаларини айтди

Мюнхеннинг «Бавария» клуби ҳужумчиси Гарри Кейн жамоанинг жорий мавсум Чемпионлар лигасидаги имкониятлари ҳақида фикр билдирди. Ўтган мавсумда баварияликлар чорак финал босқичида тўхтаган, икки ўйин натижасига кўра Миланнинг «Интер» жамоасига ютқазиб қўйганди.

Кейннинг айтишича, ўтган мавсумда жамоа қисқа вақт ичида кўп учрашув ўтказишга мажбур бўлган, шу пайтда жароҳатлар сабаб таркиб сезиларли даражада кучсизланган. Бу сафар «Бавария» умумий босқичда илк саккизликка кириб, ортиқча ўйинлардан қочишни мақсад қилган.

«Биз 1/8 финалда «Байер»га қарши аъло ўйнадик. «Интер» билан учрашувларда ҳам яхши ўйин кўрсатдик, гарчи мағлуб бўлган бўлсак ҳам.

Ҳаммаси бошқача якунланиши мумкин эди. «Барселона» билан ўйиндан кейин ҳимояда бошқача ҳаракат қила бошладик ва бу жорий мавсумда бизга ёрдам бермоқда.

Албатта, Чемпионлар лигасини ютиш жуда қийин: энг юқори даражада бўлиш ва ўйиндаги энг яхши лаҳзаларингдан максимал фойда олиш керак. Бу сафар айнан шунга эришишни умид қилмоқдамиз», — дея Кейннинг сўзларини келтиради Bayern & Germany.

«Бавария» Чемпионлар лигаси умумий босқич жадвалида олти турдан сўнг 15 очко билан иккинчи ўринда бормоқда.