«Ars Aeterna: талантлар очышта» фестивале Камал театрында гала-концерт белән тәмамланачак
Бүген, 19 декабрьдә, «Ars Aeterna: талантлар очышта» фестивале Галиәсгар Камал исемендәге татар дәүләт академия театрының яңа бинасының көнчыгыш залында гала-концерт белән тәмамланачак. Проектны, «Татнефть» компаниясе грантын кулланып, «Идиллия Арт» иҗади яшьләр үзәге гамәлгә ашыра.
Гала-концертта танылган башкаручылар да, Татарстанның балалар музыка мәктәпләрендә, балалар сәнгать мәктәпләрендә һәм музыка көллиятләрендә укучы талантлы балалар да чыгыш ясаячак.
Концерт программасын Камал театры оркестры тәкъдим итәчәк (баш дирижеры һәм сәнгать җитәкчесе – Данияр Соколов).
Казан сәхнәсендә шулай ук «Ars Aeterna: талантлар очышта» лауреатлары да чыгыш ясаячак. Алар арасында Раяна Кунафина (скрипка, Чаллының 4нче номерлы балалар музыка мәктәбе), Жасмин Галимова (флейта, Чаллының 3нче номерлы балалар музыка мәктәбе), Азалия Гыйззәтуллина (скрипка, Түбән Кама музыка көллияте), Камил Әхмәдиев (баян, М.Г.Юзлибаев исемендәге Җәлил балалар музыка мәктәбе) һәм Кәрим Хөснуллин (баян, Әлмәтнең 1нче номерлы балалар музыка мәктәбе) булачак.
Камал театрында Антонио Вивальди, Вольфганг Амадей Моцарт, Жорж Бизе, Петр Ильич Чайковский кебек классикларның, шулай ук Миләүшә Хәйруллина һәм Ильяс Камал кебек татар композиторларының әсәрләре яңгыраячак.
Концерт 19:00 сәгатьтә башлана.