Шавкат Мирзиёевнинг Токио саммитидаги таклифлари
Ўзбекистон Президенти Шавкат Мирзиёев Марказий Осиё ва Япония давлатлари ўртасидаги ҳамкорликни ривожлантириш бўйича бир қатор ташаббуслар билан чиқди. Президентнинг таклифлари марказида 2040 йилгача стратегия ишлаб чиқиш ва минтақа етакчиларининг мунтазам учрашувларини ташкил этиш масалалари турибди.
20 декабр куни Токиода ўтказилган «Марказий Осиё + Япония» мулоқотининг биринчи саммитида Шавкат Мирзиёев давлат раҳбарлари даражасидаги бундай учрашувларни ҳар икки йилда бир марта ўтказишни таклиф қилди. Кейинги учрашувлардан бирини Ўзбекистон ўз ҳудудида ўтказишга тайёрлигини билдирди.
Президент, шунингдек, «Марказий Осиё – Япония 2040» стратегиясини ишлаб чиқишни таклиф қилди. Бу ҳужжат узоқ муддатли ҳамкорлик йўналишларини белгилаб бериши ва иқтисодий ҳамда барқарор ривожланиш соҳасидаги аниқ лойиҳаларни ўз ичига олиши лозим.
Иқтисодиётга оид ташаббуслар доирасида Мирзиёев минтақа инфратузилмаси ва саноатини ривожлантириш учун инвестиция жамғармаси ташкил этишни таклиф қилди. Шунингдек, саноат кооперацияси ва технологияларни узатиш учун япон технопарклари тармоғини шакллантиришни таклиф этди.
Президент рақамли кун тартибига алоҳида урғу берди. У сунъий интеллект, нарсалар интернети ва киберхавфсизлик соҳаларидаги лойиҳаларни бирлаштирувчи «Марказий Осиё – Япония» рақамли марказини ташкил этишни таклиф қилди.
Бундан ташқари, Мирзиёев «яшил» энергетика, экология ва транспорт соҳаларида ҳамкорликни ривожлантиришни, шунингдек, сейсмик хавфсизлик йўналишида ҳамкорликни кучайтиришни таклиф этди. Гуманитар соҳада эса таълим соҳасидаги ҳамкорликни кенгайтириш ва ёшлар дастурларини ишга тушириш зарурлигини таъкидлади.
Саммит якунида иштирокчилар Токио декларациясини қабул қилдилар.