Қашқадарёда алиментдан қочган ота диван остидан топилди
Қашқадарё вилоятида алимент тўлашдан бўйин товлаб, узоқ вақт яшириниб юрган эркак кутилмаган жойдан — уйидаги диван тагидан топилди. Бу ҳолат ижтимоий тармоқларда ҳам қизғин муҳокамаларга сабаб бўлмоқда.
Маълум бўлишича, гап Чироқчи туманида истиқомат қилувчи фуқаро ҳақида кетмоқда. У суд қарорига мувофиқ, вояга етмаган фарзанди учун алимент тўлаб бориши шарт эди. Бироқ қарздор ўз мажбуриятини бажармасдан, давлат ижрочиларидан яширинишни маъқул кўрган.
Мажбурий ижро бюроси ходимлари томонидан бир неча бор расман огоҳлантирилишига қарамай, у алимент тўлашни бошламаган. Ҳатто уйига қилинган бир неча ташрифлар ҳам самара бермаган — қарздор изсиз “йўқолиб қолган”.
Натижада унга нисбатан қидирув эълон қилинган. Қашқадарё вилояти МИБ Қидирув шўъбаси ходимлари ўтказган тезкор тадбирлар давомида эса у ўз уйида, ётоқхонадаги диван остига беркиниб олган ҳолда аниқланган.
Айни пайтда қарздорга нисбатан алимент маблағларини ундириш ва қонун доирасида тегишли чоралар кўриш ишлари давом эттирилиши маълум қилинди.
Қисқаси, фарзанд ҳақидан қочиб қутулиб бўлмайди — ҳатто диван ости ҳам ишончли паноҳ эмас.