Ринат Фазылов: Дәүләт сәясәтенең өстенлекләре - гаилә, махсус операция һәм суверенитет
Дәүләт башлыгы Владимир Путин дәүләт сәясәтенең өстенлекле юнәлешләрен раслады: гаилә, махсус хәрби операция, дәүләтебезнең суверенитеты. Бу хакта «Татар-информ»га ТР Дәүләт Советының Законлылык һәм хокук тәртибе комитетының рәисе урынбасары Ринат Фазылов хәбәр итте.
«Безнең Президент кешеләрнең ихтыяҗларын һәм аларны борчыган проблемаларны яхшы аңлый. Төрле төбәкләрдән килгән журналистлар һәм гражданнар сорауларына җавап биргәндә дәүләт башлыгы дәүләт сәясәтенең өстенлекләрен раслады: гаилә, махсус хәрби операция, дәүләтебезнең суверенитеты. Президент билгеләп үткәнчә, 2025 елда хәрби хезмәткәрләрдән һәм аларның гаиләләреннән килгән мөрәҗәгатьләр саны сизелерлек кимегән», — диде Ринат Фазылов.
Ул туры линия форматы ил халкын борчыган реаль проблемаларны ачыклау һәм органнарны тиз арада җавап бирүгә этәрүдә нәтиҗәле булуын билгеләде. Президент игътибарны ике мөһим темага юнәлтте: түләүләрнең тоткарлануы һәм һәлак булганнарның гаиләләре өчен таныклыклар алу мәсьәләсе.
«Бүгенге туры линиядән соң әлеге проблемаларга тагын да җитдирәк каралачак, ведомстволар арасындагы хезмәттәшлек көчәйтеләчәк. Владимир Путин волонтер оешмаларының һәм аларның солдатлар һәм гаиләләргә ярдәмдә катнашуы әһәмиятен билгеләде. Моннан тыш, дәүләт башлыгы махсус хәрби операциядәге солдатларны тыныч тормышка әзерләүнең әһәмиятен искәртте», — дип өстәде Ринат Фазылов.