Путин авиабилетларга бәяләр үсешен очкычлар җитмәү белән бәйләп аңлатты
Россиядә авиатөзелеш традицияләре көчле, ләкин гражданлык авиациясе һәрвакыт хәрби авиациядән соң икенчел планда гына кебек алып барылган.
Бу хакта Россия Президенты Владимир Путин туры эфир барышында әйтте.
«Бездә гражданлык һәм хәрби авиатөзелеш традицияләре яхшы. Тик гражданлык авиациясе хәрби-транспорт авиациясеннән барлыкка килгән рәвештә генә иде. Ә хәрби авиациягә бөтенләй башка карашлар – тормыш циклы буенча да, керосин чыгымнары, тавыш буенча да. Гражданлык авиациясе белән генә аерым шөгыльләнмәдек диярлек», – дип таныды Илбашы совет чорын күздә тотып.
Путин сүзләренчә, хәзерге вакытта Россия граждан очкычларына мохтаҗ. Ул авиабилетларга бәяләр үсешен авиапарк җитәрлек тулмавы белән бәйләде.