Александер Исак Швецияда 2025 йилнинг энг зўр футболчиси бўлди

Швеция футболида 2025 йилнинг энг муносиб ва энг ёрқин футболчиси номи маълум бўлди. Мазкур унвон «Ливерпул» ҳужумчиси Александер Исакка насиб этди. У Швеция футбол иттифоқи ҳамда Aftonbladet нашри томонидан анъанавий равишда топшириладиган нуфузли «Олтин тўп» мукофоти соҳиби бўлди.

26 ёшли форвард учун бу соврин фаолияти давомидаги илк катта шахсий мукофот ҳисобланади. Исакнинг барқарор ўйини, ҳал қилувчи голлари ва жамоа учун қилган ҳиссаси мутахассислар ва мухлислар томонидан юқори баҳоланди.

Швеция футбол иттифоқининг расмий сайтида эълон қилинган хабарда қайд этилишича, Исак бу мукофотни «Нюкасл» сафида кўрсатган юқори даражадаги ўйинлари орқали қўлга киритган. У ўзининг ноёб техник маҳоратлари, жисмоний куч-қуввати ва гол уришдаги самарадорлиги билан дунёнинг энг рақобатбардош лигаларидан бирида тарих яратишга муваффақ бўлган. Айни пайтда у «Нюкасл»га 70 йилдан бери кутилган катта совринни қўлга киритишда ҳал қилувчи роль ўйнаган футболчилардан бири сифатида эътироф этилган.

Маълумот ўрнида, Александер Исак ўтган мавсум «Нюкасл» билан Англия Лига кубогида ғалаба қозонган. Ушбу муваффақиятдан сўнг, ёзги трансферлар ойнасида катта сумма эвазига «Ливерпул»га кўчиб ўтди ва янги жамоасида ҳам юқори даражада ўйин намоён этмоқда.

Исакнинг «Олтин тўп»ни қўлга киритиши унинг нафақат Швеция футболида, балки Европа миқёсида ҳам нуфузи тобора ошиб бораётганидан далолат беради. Мухлислар эса ундан янги мавсумларда янада катта ютуқлар кутишмоқда.