«Ланс» Абдуқодир Ҳусановни ижарага олишга уриниб кўрди
Франциянинг «Ланс» клуби Ўзбекистон терма жамоаси ҳимоячиси Абдуқодир Ҳусановни ижарага олиш масаласида «Манчестер Сити»га расмий таклиф билан чиққан. Бу ҳақда championat.asia сайти бош муҳаррири Нарзулла Сайдуллаев ўз Telegram канали орқали маълум қилди.
Манбага кўра, «Ланс» президенти Жозеф Мари Угурлян шахсан «Манчестер Сити» раҳбарияти билан боғланиб, Ҳусановни ярим мавсумга ижара асосида олиш имкониятини муҳокама қилган. Франция клуби бу трансфер орқали жамоа мудофаасини янада мустаҳкамлашни ва чемпионлик пойгасида рақобатбардошлигини оширишни режалаштирган.
Айни пайтда «Ланс» Франция чемпионатида юқори ўринлар учун кураш олиб бормоқда. Клуб раҳбарияти Абдуқодир Ҳусанов жамоага қўшилса, айниқса ПСЖ билан рақобатда катта ёрдам беришига ишонган. Ёш, жисмонан бақувват ва интизомли ҳимоячи сифатида Ҳусанов «Ланс»нинг ўйин услубига мос келиши таъкидланган.
Бироқ «Манчестер Сити» томони бу таклифни рад этган. Англия гранди футболчини ҳозирча ижарага бериш имкони йўқлигини маълум қилган. Клуб Ҳусановни ўз режаларида муҳим футболчи сифатида кўраётгани ва уни жамоа таркибида сақлаб қолишни мақсад қилгани айтилади.
Шу тариқа, «Ланс»нинг Ҳусановни ижарага олиш бўйича уриниши амалга ошмади. Бироқ бу ҳолат Абдуқодир Ҳусановга Европада бўлган қизиқиш тобора ошиб бораётганидан далолат беради. Ёш ҳимоячининг келажаги эса ҳали олдинда — у ҳамон катта ўйинлар ва катта қарорлар арафасида.