The Guardian Дембелени 2025 йилнинг энг яхшиси деб топди

Британиянинг нуфузли The Guardian нашри 2025 йил учун дунёдаги энг яхши 100 нафар футболчи рўйхатини эълон қилди. Рейтинг журналистлар, амалдаги мураббийлар ва собиқ профессионал футболчиларнинг овозлари асосида тузилган бўлиб, йил якунлари бўйича футбол оламидаги асосий кучлар яна бир бор саралаб чиқилди.

Нашр хулосасига кўра, 2025 йилнинг энг яхши футболчиси деб ПСЖ вингери Усмон Дембеле эътироф этилди. Франциялик ҳужумчи йил давомидаги барқарор ўйини, ҳал қилувчи ҳаракатлари ва жамоасига қўшган улкан ҳиссаси билан рақобатчиларини ортда қолдирди. Мутахассислар унинг тезлиги, дриблинги ва ўйин тақдирини ҳал қилиш қобилиятини алоҳида таъкидламоқда.

The Guardian эълон қилган топ-10 рўйхат қуйидагича кўриниш олди:
10-ўрин — Педри («Барселона»),
9-ўрин — Муҳаммад Салоҳ («Ливерпул»),
8-ўрин — Рафиня («Барселона»),
7-ўрин — Ашраф Ҳакими («ПСЖ»),
6-ўрин — Эрлинг Ҳоланд («Манчестер Сити»),
5-ўрин — Ҳарри Кейн («Бавария»),
4-ўрин — Килиан Мбаппе («Реал»),
3-ўрин — Витиня («ПСЖ»),
2-ўрин — Ламин Ямал («Барселона»),
1-ўрин — Усмон Дембеле («ПСЖ»).

Рейтингда яна бир қатор таниқли юлдузлар ҳам ўрин олган. Масалан, Коул Палмер 12-поғонадан, Хвича Кварацхелия 14-ўриндан, Деклан Райс 15-ўриндан жой олган. Жуд Беллингҳем 18, Винисиус Жуниор 22, Лионел Месси 34, Криштиану Роналду эса 51-поғонада қайд этилган. «Манчестер Юнайтед» ярим ҳимоячиси Бруну Фернандеш 55-ўрин билан чекланди.

Қайд этиш жоизки, Усмон Дембеле бугунги натижа билан чекланиб қолмаган. У аввалроқ «Олтин тўп» ҳамда The Best мукофотларини ҳам қўлга киритиб, 2025 йилни шахсий фаолиятидаги энг ёрқин мавсумлардан бирига айлантирди. Дембеле учун бу йил — ҳақиқий юлдузли йил бўлди, дейиш мумкин.