“Хостем бо ҳавопаймо ба Душанбе равем, вале гуфтанд, билет нест”

Истгоҳи таксиҳо дар Хуҷанд, ҷое, ки мусофиронро ба Душанбе мебаранд, мисли рӯзҳои пешина серодам нест. Ронандагон мегӯянд, шояд боридани барфу фаромадани ярч ё тарма мардумро тарсондааст.

Теъдоди ками мусофироне ҳам, ки ба роҳ баромадаанд, сафари худро ба Душанбе муҳиму зарурӣ хонданд. Бархе дигар натавонистаанд, ки ба ҳавопаймо билет гиранд.

“Рости гап, хостем, ки бо ҳавопаймо равем, афсӯс гуфтанд, ки парвоз ҳам нест, билет ҳам нест. Бинобар ин, зарур шуморидем, ки аз роҳи заминӣ ба Душанбе равем,” – гуфт Садриддин Саидов, сокини Хуҷанд.

Чанд мусофир иддао карданд, ки дар чунин рӯзҳои сард нархи роҳкирои таксӣ аз Хуҷанд ба Душанбе низ гарон шудааст.

Ронандагон сабабро афзоиши харҷ дар зимистон номиданд. Чун, ба гуфтаи онҳо, бо сабаби гоҳе баста шудани роҳ маҷбуранд, ки соатҳо дар як ҷой биистанд ва барои гарм шудани мусофирон мошини худро хомӯш накунанд.

Ронанда Баҳриддин Аюбов гуфт: “Дар тобистон агар 30 литр бензин сарф шавад, ҳоло 40 литр сарф мешавад. Меистӣ, гарм мекунӣ.”

Дар ҳамин ҳол, Маркази обу ҳавосанҷӣ дар Тоҷикистон аз эҳтимоли фаромадани селу ярч дар минтақаҳои кӯҳистонӣ ҳушдор додааст. Ба иттилои ин ниҳод, эҳтимол дар рӯзҳои оянда ин вазъ идома кунад ва аз сокинон хоста шудааст, ки аз сафарҳои бидуни зарурат худдорӣ намоянд.

Ширкати IRS, масъули нигоҳубин ва ҷамъоварии пул дар роҳи Душанбе-Чаноқ, ки солҳо боз номи моликонаш расман эълон нашудааст, шаби 17-уми декабр аз фаромадани тарма хабар дод. Ҳоло ин ягона роҳе, ки шимоли кишварро бо пойтахт мепайвандад, боз аст, агарчӣ убуру мурур аз он мисли баҳору тобистон осон нест.