Тайван метросидаги қонли ҳужум жамиятни ларзага солди
19 декабрь куни Тайванда жамоат хавфсизлиги билан боғлиқ жуда оғир ва камёб фожеа содир бўлди. Маҳаллий вақт билан соат 17:20 атрофида 27 ёшли эркак аввалига метрополитеннинг энг гавжум бекатларидан бирига тутунли гранаталар ва “Молотов коктейллари”ни улоқтирган. Бу ҳолат бекатдаги йўловчилар орасида саросима ва қўрқувни кучайтирган.
Шундан сўнг у метро йўналиши бўйлаб тахминан 800 метр масофада жойлашган бошқа бир бекат томон югурган. Йўл-йўлакай у учраган бир неча кишини пичоқлаб кетгани маълум қилинмоқда. Иккинчи бекатга етиб боргач ҳам ҳужум тўхтамаган: у ерда ҳам гранаталар ташланган ва одамларга пичоқ билан ҳужум қилинган.
Ҳужумдан кейин гумондор яқин атрофдаги бинолардан бирининг томидан пастга сакраб тушган. У оғир аҳволда шифохонага олиб борилган, аммо шифокорлар унинг ҳаётини сақлаб қола олмаган. Шу тариқа, ушбу фожеа оқибатида ҳалок бўлганлар сони тўрт нафарга етган.
Қурбонлар орасида қотилни тўхтатишга уриниб, жасорат кўрсатган эркак ҳам борлиги айтилмоқда. У аввал яраланган ҳолда касалхонага етказилган, аммо кейинчалик у ерда вафот этган.
Расмий маълумотларга кўра, гумондор Чанг Вен исмли Тайван фуқароси бўлган. Мамлакат бош вазири Чо Жунг бу ҳужумни “қасддан амалга оширилган ҳаракат” дея баҳолади. Терговнинг дастлабки версиясига кўра, у барча ҳаракатларни ёлғиз ўзи бажарган.
Фожеадан сўнг бутун мамлакат бўйлаб темирйўл ва метро бекатларида хавфсизлик чоралари кескин кучайтирилди. Қўшимча патруллар жойлаштирилди, текширувлар сони оширилди.
Қайд этиш жоиз, Тайванда зўравонлик билан боғлиқ жиноятлар даражаси анча паст ҳисобланади ва бундай ҳолатлар жуда кам учрайди. Шунга ўхшаш сўнгги йирик воқеа 2014 йилда содир бўлган бўлиб, ўшанда Тайпей метросида тўрт нафар инсон ҳалок бўлган, айбдор эса икки йил ўтиб қатл этилган эди.
Шу сабабли бугунги ҳужум Тайван жамияти учун кутилмаган ва оғир зарба сифатида қабул қилинмоқда.